«Приишим орта мектебі» КММ- де 3 «Б» сыныбында «Өзіңді буллингтен қорға» тақырыбында сынып сағаты өткізілді.

Сынып сағатының мақсаты – оқушылардың буллинг, оның түрлері мен салдары туралы түсініктерін қалыптастыру, қауіпсіз мінез-құлық дағдыларын дамыту және агрессия мен қорқыту жағдайларына дұрыс әрекет етуге үйрету.

Сынып сағаты барысында оқушылар буллингтің не екенін, оның қарапайым жанжалдан айырмашылығын талқылады. Буллингтің түрлері: физикалық, сөздік, психологиялық және кибербуллинг туралы түсініктерін кеңейтті. Оқушылар түрлі өмірлік жағдайларды қарастырып, әр жағдайда қалай дұрыс әрекет ету керектігін бірге анықтады.

Буллингке тап болған кездегі мінез-құлық ережелеріне ерекше көңіл бөлінді: үндемей қалмау, агрессияға агрессиямен жауап бермеу, ересек адамнан көмек сұрау, ренжіткен адамды емес, жәбірленушіні қолдау және айналадағы адамдарға құрметпен қарау.

Оқушылар талқылауға белсенді қатысып, өз ойларын білдірді, жұмыс парақтарындағы тапсырмаларды орындады, буллинг тақырыбындағы суреттерді бояды және ізгі, мейірімді мінез-құлыққа мысалдар келтірді.

Сынып сағатының соңында оқушылар сөздерді «жақсы сөздер» және «жағымсыз, жүрекке тиетін сөздер» деп бөліп орналастырды. Барлық оқушы іс-шараға белсенді қатысты.